/Planet's Members

Planet's Members

الحمد لله و كفى بها نعمة و صلاة و سلاما على عباده الذين اصطفى ، لا سيما عبده المصطفى صلى الله عليه وسلم
الحمد لله ربنا كرم الواحد و فتح شركة و صار عنده موظفين، مما لا شك فيه إن الموظفين دول أكيد كده مش شغالين عشوائى
أكيد متقسمين مجموعات كل مجموعة مسؤولة عن حاجة
و أكيد الشركة دى ليها مدير اللى هو رقم واحد

طب ده ايه علاقته بنظام التشغيل بتاعنا
المدير = root
الموظفين = users
المجموعات = groups

واحد هيطلع يقول و الله احنا مذاكرين انجليزى كويس مش هتيجى انت تعرفنا معانى الكلمات 😀
ماشى يا سيدى ، انا مش قصدى ترجمة حرفية .. انا أقصد ان عندنا فى لينكس -مجازا– نفس فكرة الشركة
الرووت و احنا خلاص عرفناه تمام
الجروبس بتحتوى على عدد من اليوزرز اللى بكون عايز اديهم كلهم نفس الصلاحية

مثال :
انا عندى ملف فيه أرقام رواتب الموظفين و مش منطقى انى أخلى الملف ده صالح التعديل فيه لأى موظف و إلا هنلاقى بيت مدير الشركة اتخرب تانى يوم الصبح 😀
أنا عايز أخلى مساعدين المدير بس هم اللى يعدلوا
مساعدين المدير أحمد و محمد و محمود
هعمل جروب اسمها أدمنزر و أخلى اليوزرز الثلاثة دول فيها
و أخلي الجروب دى المسؤولة – صاحبة – الملف  و أبدأ أحدد صلاحيتهم
خلاصة الموضوع ان أى حاجة هقررها على المجموعة هتقرر بالتبعية على اليوزرز اللى فيها

محدش يقلق هيكون فيه مقال خاص بالصلاحيات Pernissions
المهم بس فكرة اليوزرز و الجروبس تكون وضحت للناس

نظام لينكس – مجازا – بيعمل حاجة ظريفة جدا
الرووت أول ما يضيف يوزر جديد للسيستم ..توماتيكى توماتيكى النظام بعمل جروب خاصة ليها نفس اسم اليوزر ده لا و مش كده و بس و بيسميها بإسمه كمان

الجروب دى بتكون ساعتها لا تحتوى على يوزر واحد اللى هو اليوزر المضاف ساعتها
كفاية بقى كده رغى و عجن و ندخل على الشغل اللى بيأكل عيش

ازاى نضيف يوزر للسيستم

عندنا أمر useradd و ليكن
useradd ahmed
useradd mahmoud
useradd mohamed
طبعا مش محتاج أقول انك لازم تكون رووت و انت بتعمل الحاجات دى ^_^

انا كده ضفتهم للسيستم …لازم أحدد لكل واحد منهم باسوورد خاصة بيه
و ليكن 12345 لكل واحد فيهم
عندنا أمر  passwd
passwd ahmed

هيطلب منى أدخل  New password
هندخلها
هيطلب منى أعيدها تانى
هنعيد .. هيديك ملاحظ ان الباس ضعيفة هنقول له الدار أمان و مش مشكلة

و ده الشكل العام ..طبعا مش محتاج أقول ان الباس مش بتتكتب على هيئة نجوم ..هى مش بتظهرلك من أساسه 😀

1

دلوقتى هنضيف جروب جديدة للسيستم اللذيذ بتاعنا و هنسميها Admins
هنستخدم أمر groupadd
groupadd admins

دلوقتى هحتاج أضيف الرجالة اللى فوق دول للجروب أدمنز
هنستخدم أمر usermod و معاه كام اوبشن كده

usermod -a -G admins ahmed
و نفس الكلام مع الباقى
طب لو انا عايز أتأكد من الكلام ده
هستخدم أمر groups مع كل يوزر
عشان أعرف ايه هى الجروبس اللى اليوزر ده مشترك أو مضاف فيها

2

هنلاحظ ان كل واحد من الرجالة دول مشترك فى اتنين جروب
الأولى بنفس إسمه و دى اللى اتكلمنا عليها فى أول المقال
و التانية اللى احنا أضفناه بإيدينا اللى هى أدمنز

[divider scroll_text=””]

Related Commands
userdel
users
groupdel
groupmod
groupmems

[divider scroll_text=””]

كده نسبيا يعتبر خلصنا فاضل بس حاجة صغيرة
بطاقة الرقم القومى 😀
دلوقتى انت ينفع تنزل من بيتكم تجيب العشاء من غير ما يكون معاك بطاقة الأيام دى و الله انت و نصيك بقى 😀
نفس الكلام مع الـ users و الـ groups كل واحد منهم لازم يكون له id خاص بيه هيعمل بيه ايه و فائدته ايه
و ازاى نستخدمه هنعرفها فى وقتها بإذن الله
الرقم ده بالنسبة لليوزرز بيكون اسمه uid و بالنسبة للجروبس بيكون اسمه gid
الرجل الكبير بتاعنا اللى هو الرووت بياخد رقم ثابت هو 0 و الجروب بتاعته الخاصة بيه – اللى هى على اسمه – برضه بتاخد نفس الرقم
الأمر اللذيذ اللى بيعرفنا الموضوع ده هو id
و ليكن id ahmed
طلع قيمة uid بتاعت أحمد و قيمة gid بتاعت الجروب الأساسية بتاعت أحمد و كما قيمة gid بتاعت كل الجروبات اللى مشارك فيها احمد و بأساميهم كمان

3

واحد محترم كده و ابن ناس هيقول انت مطلع الرقم عندك 1001 و عندى مطلع 501 ليه
هقولك الرقم ده انت بتقدر تحدد بنفسك و انت بتضيف يوزر للسيستم فى الأول خالص و ممكن كمان تعدله
لا لا مش هقولك الأمر 😀 بس هقولRTFM 😀
بصفة عامة الأرقام الخاصة باليوزرز بتبدأ من أول 500 و انت طالع
طبعا الكلام على system users فيه نوع تانى منهم بس مش هتكلم عليه دلوقتى خااالص ﻷنه مش هيفيد بحاجة و هو service users و قتها هنتكلم عنه لغاية ما نزهق بإذن الله

كده النهاردة نقول الحمد لله و بارك الله فيما رزق
و الناس تجهز نفسها المرة الجاية لواحد من أتقل و أخف و أرخم و أحب المواضيع فى الشغل كله تقريبا بنستخدمه يوميا و فيه ناس كتير عندها قلق معاه

ايه هو و هنتعامل معاه ازاى ..المرة القادمة بإذن الله ^_^

دمتم بود و فى أمان الله 🙂