/Planet's Map

Planet's Map

الحمد لله و كفى و بها نعمة و صلاة و سلاما على عباده الذين اصطفى لا سيما عبده المصطفى صلوات ربى و سلامه عليه

لو سألت الناس اللى شغالين و يندوز بقالهم فترة قليلة او كبير يعنى ايه Desktop
اه هو الشيئ اللى لما بتفتح الكمبيوتر بتلاقيه فى وشك

طب هو برضه عبارة عن ايه ؟!

ببساطة ما هو إلا Folder !!
مش مصدقنى ؟!
افتح C ادخل على users هتلاقى اسمك منور هناك على folder روح افتحه هتلاقى Folder تانى اسمه Desktop افتحه و قارن بين الحاجات اللى فيه و الحاجت اللى موجودة عندك بره

بالظبط مفيش اى فرق بإستثناء بعض shortcuts
تمام اوى

ننقل على حاجة تانية
لو انت واقف فى نفس folder اللى عليه اسمك هتلاقى يمينك folder تانى اسمه Downloads هتلاقى على الشمال My Videos ممكن فوق حبتين My Pictures

الشاهد ان نظام التشغيل بيهيأ لك تقسيمة مناسبة لكل احتيجاتك بمعنى انك لو منزل الويندوز مثلا على اهلارد ككل مش نظام Partitions هتلاقى كل حاجة متقسمة بشكل مناسب
طب لو انا سألتك ايه البوابة الرئيسية عشان أقدر أوصل للحاجات دى ؟؟

واحد بيقول Folder اللى عليه اسمى .. ممممم ماشى
واحد تانى بيقول Folder اللى اسمه users .. مممم معاك

هى دى كلها ممكن اقول عليها بوابات .. بس الاتنين أقدر أدخل لهم منين ؟؟!
بالظبط من C
لذلك انا اقدر اقول ان اعلى نقطة عندى هى C
يعنى ايه ..هقولك

خليك واقف فى Desktop Folder اللى كنا فيه من شوية فوق
و عايزك تطلع على bar اللى موجود فى window اللى انت فاتحها ايون اللى مكتوب فيها Desktop , Users و كلمات تانى
اضغط عليها
هيطلعلك حاجة بالشكل ده

1460244_638654219511100_745404655_n

C:\Users\Mohamed\Desktop

ده معناه انك واقف – فاتح يعنى- الفولدر اللى اسمه ديسكتوب اللى موجود فى فولدر تانى اسمه محمد اللى موجود فى فولدر ثالث اسمه يوزرز اللى كل دول موجودين فى C
اى مكان على السيستم هتحب توصله هتلاقى ان أعلى نقطة أو أول نقطة فى المسار هتكون C

كل اللى انا بتكلم عليه ده اسمه Windows Hierarchical File System

و دى صورة بتوضح الكلام اللى فوق كله

path443

ناخد بريك لذيذ و نلعب مع بعض لعبة صغيرة 😀

عايزين نطلع الاختلافات بين الصورة اللى فاتت
و الصورة دى

linux

مممممممم ايه الأخبار
تمام هو نفس الشكل تقريبا
بس انت حاطط / بدل C

و الفولدر اللى اسمه home شبه الفولدر اللى اسمه users فى محتواه

جميل جدا و لو قاعدنا كمان ربعاية هنلاقى تقريبا فيه حاجات كتير متشابهة بنفس الفكرة
الصورة التانية دى هى Linux Hierarchical File System

و ده اللى كنت عايز اوصل له النهاردة
الناس اللى مش عارفة تقسيمة الويندوز من جوه …تعرفها
و الناس اللى عارفة ده بقلوهم ان الشكل العام تقريبا مفيش اختلاف بين التقسيمة الويندوز و اللينكس

طب اللى عارف دى و دى 😀
ندخل فى حاجة جديدة صغيورة

انا كتبت فوق السطر ده
C:\Users\Mohamed\Desktop
طبعا Mohamed دي اسم اليوزر اللي أنا عامله على جهازي، عندك هيكون مختلف حسب اللي أنت عامله

السطر ده انا بسميه path أو بمعنى أدق absolute path
و قلنا فوق مجازا ان أعلى نقطة فى السيستم هى C انما فعليا أعلى نقطة فى السيستم هى / اللى بعد Cعلى طول

نفس ال/ دى عندنا واحدة زيها فى اللينكس و هى اللى انتم شفتوها فوق فى الرسم

طب لو أنا عاوز أوصل مثلا للديسكتوب فى اللينكس ..بسيطة
شيل C و خلى / شيل users و حط home و سيب الباقى زى ما هو

home/Mohamed/Desktop/

استنى كده انا عايزك تكتب الأمر ده
/ls /home
و ده كمان
ls /home/Mohamed

شوف كده النتيجة اللى هيطعهالك الأول و النتيجة اللى هيطلهالك التانى و شوف كده إذا كانوا بيفكروك بحاجة لا سمح الله ولا حاجة

سامعك ياللى بتقول ايه الأمر ls ده
ده أمر بيعمل list للكل الحاجت الموجودة فى الفولدر اللى انت موجود فيه ..استنى احنا قلنا الفولد اسمه ايه عندنا ..صح directory

يعنى من الاخر بيعرفنا ايه اللى موجود فى directory ده بس كده 😀
طب بما ان الناس عندها زهايمر الأيام دى لدرجة انه ممكن ينس هو واقف فين

عملنالكم الأمر ده pwd
ده بيقولك path الكامل للمكان اللى انت فيه بس كده 😀

أمر تاني مهم وهو cd ده بيغير المسار اللي أنت شغال فيه حاليا، يعني مثلا لو أنا في المسار home/ وعاوز انتقل لـ home/Mohamed/Desktop/
اكتب cd /home/Mohamed/Desktop

يفضل سؤال منطقى و مهم ايه هى / دى برضه غير انها أعلى نقطة ..الجزء ده و بإستفاضة هنتكلم عنه فى مقال مهم جدا و هيكون هو الجزء التانى للمقال ده بإذن الله كده احنا خلصنا الجزء الأول من خريطة الكنز قصدى خريطة السيستم

كفاية كده النهاردة
اه قبل ما أختم

ان شاء الله هيكون فيه جزء جديد فى المقال اسمه Related Commands

انا فى المقال أكيد مش هقول كل الأوامر المتعلقة بالموضوع لازم أخليك تدور و تطلع عينك 😀
هكتب فى الجزء ده أوامر مهمة بس مشرحتهاش و أسيب الناس تدور عليها

و على رأى المثل RTFM 😀

دمتم بود ^_^