زى ما اتكلمنا فى المقاله السابقه عن ال IP وقولنا ان فى اكثر من طريقه بنستخدمها عشان نوفر فى الايبيهات المستخدمه
وكانت احد الطرق دى هى استخدام حاجه اسمها ال subnetting
النهارده هنعرف ايه هى الطريقه دى بالظبط
كلمه subnetting معناها تقسيم الشبكه الكبيره الى مجموعه شبكات صغيره
يعنى ايه الكلام دا ؟
هنعرف يعنى ايه بس بمثال من الواقع العملى عشان يكون الكلام اوضح
بس قبل ما تكمل المقال تأكد انك قريت المقاله السابقه كويس و فاهمها، وفاهم بردو ازاى تحول الارقام من decimal الى binary و العكس .
تخيل انك عندك شركه و الصوره الى فاتت دى بتوضح ال infrastructure بتاعتها، عندك 3 راوتر كل واحد واصل ب local network عن طريق ال switch وواصلين ببعض زى ما فى الصوره كده
وزى ما عرفنا بردو ان الراوتر بيربط بين شبكتين مختلفتين، يعنى كل interface لازم يكون فى شبكه مختلفه
طب تعالوا نعد احنا محتاجين كام شبكه مختلفه عشان نحقق الصوره دى
كل interface رايح ل switch محتاج شبكه، يبقى محتاج 3
كمان على اللينكات الى بتربط كل راوتر بالتانى شبكه يبقى محتاج 2 كمان، يبقى المجموع انى محتاج 5 شبكات مختلفه
واماكنهم مكان الارقام على الصوره
طب هى الشبكات دى ببلاش كده ؟! لا طبعا بفلوس
طب ما انا بدل ما اشترى 5 شبكات مختلفين وايبيهات كتير هتضيع بدون استخدام، اشترى واحده واقسمها ل5 شبكات مختلفه
طب و هو دا ينفع ؟!
هو دا الى بيعمله ال subnetting
نفترض انك اشتريت Class C network و ليكن 216.21.5.0
طبعا Class C يبقى ال subnet mask بتاعها 255.255.255.0، الاوكتت الاخير فى الاى بى بس هو الى بيتغير من 0 الى 255، كل دى ايبيهات فى الشبكه دى
اول اى بى فى الشبكه وهو ال network id ومينفعش احطه لجهاز
و اخر اى بى وهو ال broadcast address و بردو مينفعش احطه لجهاز
طيب الشبكه دى عايز اقسمها ل 5 شبكات مختلفه عشان استخدمها واحقق الصوره الى فاتت
اول حاجه احط الشبكه كده قدامى و الماسك بتاعها
216.21.5.0
255.255.255.0
و عندى 3 خطوات رئيسيه امشى عليهم عشان اعمل subnetting
1- احسب عدد الشبكات الى انا عايزها و احول الرقم الى binary
احنا قولنا اننا محتاجين 5 شبكات
احول الرقم 5 الى الصوره ال binary يكون 00000101
طبعا كتبته على 8 بت عشان كل اوكتت فى الاى بى 8 بت , بس هو ممكن يتكتب 101 بس كده
2 – احول ال mask الى binary و احصل على ال increment و الماسك الجديد
لما احول 255.255.255.0 تبقى
11111111.11111111.11111111.00000000
زى ما كنا قولنا ان الرقم 1 بيعبر عن الجزء الخاص بالشبكه فى ال ip
و الرقم 0 بيعبر عن الجزء الخاص بال host
عدد الشبكات الى هو 5 لما حولته اخد 3 بت 101
بروح محول 3 بت من الجزء الخاص بال host فى الماسك من 0 الى 1
اى بزود الجزء الخاص بالشبكه 3 بت
و بكده يبقى الماسك الجديد كده
11111111.11111111.11111111.11100000
ارجع احوله decimal تانى يبقى كده
255.255.255.224
نحسب بقى ال increment
وهو 2 اس عدد الاصفار الباقيه فى الماسك الجديد
2 اس 5 يعطينى 32
3- استخدم ال increment عشان اطلع الشبكات بتاعتى
كل مره بزود 32
وتكون الشبكات كالتالي
216.21.5.0 >>> 216.21.5.31
216.21.5.32 >>> 216.21.5.63
216.21.5.64 >>> 216.21.5.95
216.21.5.96 >>> 216.21.5.127
216.21.5.128 >>> …
كل سطر بيعبر عن بدايه و نهايه كل شبكه
الاى بى على اليمين دا ال network id و الى على الشمال دا ال broadcast
الايبيهات الى بينهم اقدر استخدمهم عادى
و بكده حصلنا من شبكه واحده على اكتر من شبكه
وكل الشبكات الجديده هيكون ليها الماسك الجديد 255.255.255.224
لسه فى امثله كتير فى النوع الاول من ال subnetting على class A , Class B
ولكن هنشرحهم المقاله القادمه ان شاء الله
لازم تجرب مثال بأيدك
حاول تقسم الشبكه دى 195.5.20.0 و الماسك بتاعها 255.255.255.0
الى 50 شبكه صغيره ؟
