/"الخادوم" " العميل" من أنتم ؟؟!

"الخادوم" " العميل" من أنتم ؟؟!

الحمد لله و كفى بها نعمة و صلاة و سلاما على عباده الذين اصطفى لاسيما عبده المصطفى صلى الله عليه وسلم
اللهم لك الحمد كله و لك الشكر كله و إليك يرجع الأمر كله

المقال النهاردة يعتبر برضه مقال استطرادى زى المقال السابق يعنى هتكلم فيه عن بعض الاساسيات اللى للأسف فيه ناس ممكن تتحرج انها تسأل فيها،  لا و ممكن يردد الكلمة ” اللى هو مش فاهم معناها أصلا” عادى جدا

دلوقتى هفترض ان البشمهندس أحمد المليجى مثلا 😀 عنده فولدر جواه تلاوات قرآنية و فولدر فيه كورسات و فولدر فيه ألعاب
و انا كمحمد عايز اخد منه الحاجة دى، التصرف الطبيعى انى اعدى عليه فى البيت اشرب الشاى و اديله فلاشة مثلا ينقل عليها

طب هفترض ان فيه مثلا ان محمود و عبد الرحمن و عبد الله برضه عايزين نفس الحاجة !!
كده أحمد هيدفع ثمن شاى كتير أوى 😀  طب لو احمد فى السعودية مثلا و انا فى القاهرة و الحاجة عند احمد دى مهمة جدا، اعمل ايه !!
أركب الناقة و أسافر 3 ايام بلياليهن عشان ماتريال ؟! أكيد مش منطق

بلاش ياسيدى كل ده احنا خمس افراد فى نفس المكان و محتاجين الحاجة هل منطقى ان كل شوية واحد يحط فلاشته و بالترتيب و الكلام ده !
فكانت الفكرة انى اعمل جهاز كمبيوتر لذيذ و هو اللى ” يخدمنى ” خدمة العمر
جهاز كده بروسيسور i7 على رامات 8 جيجا و فيه فتحات كتير اقدر من خلاله اطلع كابلات نتوورك كتير ” اه كابلات النت 😀 ”  طبعا عشان بس بيكون الكلام دقيق انا بستخدم حاجة اسمها سويتش و راوتر و قصة كده متلزمنيش دلوقتى خالص

الجهاز هعمل معاه ايه ؟! هحط عليه كل الحاجة اللى انا عايزها
و اقوم انا جاى موصل جهازى بجهاز عن طريق ” سلك النت –مصطلح مجازى-” و يجى عبد الرحمن و عبد الله يعملوا نفس الكلام
أصبح كده جهاز أحمد هو الخادم لأنه بيخدمنى و بيخدم بقيت الرجالة، اسمه العلمى “خادوم” لا مش اللى بعزم الناس على اكل و شرب 😀  هو خادوم لأنه بيخدم أجهز كتير 😀

و أصبح جهازى و جهاز الرجالة اللى عايزين الحاجة اسمه ” عميل ” و برضه ده مش الجاسوس اللى بيتخابر من دولة لدولة 😀

“خادوم” = “Server
“عميل” = “Client

  و يصبح المنظر العام زى ما هو موضح فى الصورة

1

طبعا انا بتكلم عن شبكة صغيرة بسيطة، بس هى دى كانت فكرة الانترنت نفسه و التطور الرهيب اللى وصلنا له الايام دى

زى ما فهمت ان server ده عبارة عن جهاز كمبيوتر عادى جدا مفيهوش اى اختراع، بس احنا كنا بتكلم عن سيرفر بيخدم خمس اجهزة بس
طب لو سيرفر بيخدم 30 أو 40 جهاز، اكيد هحتاج رامات و بروسيسور و هارد ديسك كتير عشان لو انت ملاحظ ان لو السيرفر ده راح أو وقع، يبقى شقى عمر الرجالة راح

أمثلة لرامات السيرفرات

server-ram

و ده جزء من جانب غرفة فى جوجل فيها سيرفرات 😀

google-server-room

 السؤال المتوقع ايه علاقة الكلام ده كله بشغلنا
أبسطهالك 😀

دلوقتى السيرفر ده هل هيشغل نفسه بنفسه كده و لا لازم انزل له نظام تشغيل
و انا قلتلك انا عايز نظام يكون امان و مستقر إلى أبعد الحدود فهنشتغل على لينكس
و قولنا مينفعش اقول لينكس و اسيبك  و امشى لازم احدد هشتغل على ايه
من أفضل الانظمة فى ادارة السيرفرات بشكل هو RedHat Enterprise Linux
طب النظام ده هل هيشغل نفسه بنفسه و لا لازم واحد عليه ويراعيه و يا خد باله منه و الرجل مش بس بكلمته، الرجل برعايته لسيرفره و سيستمه 😀
لذلك احنا بنحتاج System admin و ده هو هدف سلسلة المقالات و هى بتخاطب مين

 أرجو ألا أكون قد أطلت عليكم فى الكلام .. دمتم بود و فى أمان الله

“الرجاء فراءة أول كومنت”