/The First Step in Our Way to Red Hat

The First Step in Our Way to Red Hat

الحمد لله و كفى و صلاة و سلاما على عباده الذين اصطفى …اللهم لك الحمد كله و لك الشكر كله و إليك يرجع الأمر كله

مين فينا مشتغلش على ويندوز ؟! تقريبا مفيش طيب لو قلنا كم واحد منهم بيعرف يسطب ويندوز بنفسه 😀 ممكن العدد يقل شوية …طيب لو قلنا مين بيعرف يقسم الهارد لبارتشنات و عارف هم بيتقسموا ازاى و ايه بين البارتشنات و بعضها ؟! هنلاقى العدد بيقل شويتين ثلاثة …

الناس اللى بيستخدموا أنظمة التشغيل بصفة عامة غالبا هم نوعين مستخدم عادى : و ده غالبا اللى شغله كله تصفح للويب أو بيلعب أو بيكتب، .. إلخ و ده لما بيحصل مشكلة للجهاز غالبا مش هو اللى بيصلحها ممكن يديه لحد تاني يصلحه

النوع الثانى بنسميه مدير نظام أو مهندس نظام : النوع ده عبارة عن درجات أقل درجة فيهم بيكون مستخدم عادى بس بيعرف ينزل النظام بتاعه بإيده بيعرف يقسم، من الآخر معاه أساسيات تقدر تخليه ميحتجش لحد و يظبط أموره بنفسه أعلى درجة فى النوع ده و بيكون ساعتها اسمه مهندس نظام System Engineer و ده اللى بيعرف يتعامل مع النظام بشكل كبير بكل صغيرة وكبيرة زى ما بيقولوا و أغلب شغله بيكون على سيرفرات مش الأجهزة العادية

متسنغربش أوى من الكلمة سيرفر Server ، ترجمتها “الخادوم” وده بيكون جهاز كبير حبتين فيه بروسيور على على رامات كبيرة على هارد محترم، بنستخدمه عشان نخدم بيه ناس كثير مثلا زى موقع media fire أكيد الموقع مش فى الشارع مثلا، إنما هو واجهة لسيرفر كبير بنحمل منه الداتا و بنرفع عليه برضه

نرجع لمرجوعنا 😀 يهمنى أوى قبل ما تبدأ الدورة دى تكون محدد انت مين من النوعين ﻷن الدورة دى بتخاطب من أول المبتدئ لغاية متوصله لمرتبة مهندس نظام مش مجرد مستخدم عادى

==========================

أشهر أنظمة التشغيل

ويندوز -ماك -لينكس Windows-Mac-Linux

بس طبعا لو سألتك انت شغال على ايه و قلتلى ويندوز ككلمة مجردة مينفعش لازم تحدد xp ولا 7 ولا 8 .. إلخ الثلاث أسماء دول يعتبروا بالنسبة لينا Category

واحد من أهم أنظمة التشغيل و ده الكلام هيكون عنه ان شاء الله هو Linux اتسمى كده ليه و تاريخه ايه و أساسه ايه كلام نظرى مش عايز أشغل دماغك بيه فى الأول بس لو انت مهتم أوى هتلاقى لينكات فى آخر الموضوع اقرأ زى ما انت عايز

يهمنى المرة دى انك تفهم معنيين مهمين جدا هنعتمد عليهم فى شغلنا كله GUI & CLI

GUI : Graphical User Interface

و ده الشكل الطبيعى بتاعنا انك تلاقى عندك أيقونات و الديسكتوب له شكل يعنى بتتحكم فى الجهاز عن طريق الماوس بالضغط على الشيئ اللى انت عايزه

CLI : Command Line Interface

و ده اللى بنسميه فى الويندوز Cmd الشاشة السوداء الصغيرة اللذيذة دى اللى أغلب الناس بتستخدمها لما بيحبوا يعملوا Ping

طب للتعامل من خلال الشاشة دى بيكون ازاى ؟؟ على عن طريق الماوس برضه ؟ لا …انما بيكون عن طريق كتابة الأمر اللى انت عايز تنفذه من خلال نظام التشغيل

آخر نقطة فى موضوعنا النهاردة …و ده السؤال اللى هنبدأ بيه المرة القادمة ان شاء الله مين اللى بيستهلك من الجهاز رامات و بروسيسور أكثر GUI or CLI ؟

و نكمل المرة القادمة بإذن الله ….دمتم فى حفظ الله و أمنه و السلام عليكم و رحمة الله و بركاته ^_^