/Linux Distributions

Linux Distributions

الحمد لله و كفى و صلاة و سلاما على عباده الذين اصطفى، اللهم لك الحمد كله و لك الشكر كله و إليك يرجع الأمر كله

واحد من أكثر مميزات اللينكس و بعض الناس بيعتبروها واحدة من عيوبه فى نفس الوقت، كثرة التوزيعات
لحظة كده يعنى ايه توزيعة أصلا
احنا اتفقنا انى لو سألتك شغال على ويندوزايه ؟ لازم تحدد عشان عندنا أكثر من نسخة
شفت بقى كلمة نسخة عندنا فى اللينكس كلمة شبهها اسمها توزيعة أو Distribution
بمعنى زى ما عندنا ويندوز 7 و XP و 8
عندنا فى اللينكس : ريدهات و ديبيان و سوزى وغيره
متركزش أوى مع سوزى 😀

خلينا فى موضوعنا ونرجع لأول نقطة فى كلامنا
ايه سبب كثرة التوزيعات للينكس و هل هى فعلا ميزة و لا عيب ؟
أول حاجة نظام ويندوز مين اللى له الحق انه يطور فيه ويعدل، سيبك انت من موضوع ويندوز بات مان و سابق ولاحق و الكلام ده 😀
انا بتكلم على تطوير حقيقى فى النظام
هل ينفع أنا و أنت نطور، و لا لازم مايكروسوفت والمهندسين بتوعها بس هم اللى يطوروا ؟
طبعا مايكروسوفت بس، إحنا آخرنا نبعت مقترحات و هم ليهم الخيار فى القبول من عدمه

انما اللينكس عكس كده تماما، عامل زى الذهب الخام
انا ممكن آخده أشكله على هيئة خاتم و أسمى الخاتم بإسمى
واحد تانى ممكن يعمل منه حلقة وهكذا

الميزة من الكلام ده ان الموضوع مفتوح قدامك بشكل غير طبيعى تجرب و تختار اللى انت عايزه و اللى يناسب جهازك
يعنى هتلاقى توزيعة مناسبة للأجهزة الضعيفة و توزيعة تانية مناسبة للأجهزة العالية و ثالثة سهلة جدا فى التعامل أسهل من الويندوز و الرابعة معمولة مخصوص عشان تنزل على سيرفرات و هكذا ..

العيب المزعوم من الناس هو الحيرة، و حله سهل جدا، انك تتعب الكيبورد بتاعك و تبدأ تبحث على النت و تسال الناس اللى جربت دى أو دى و تدخل على موقع توزيعة معينة و تبدأ تقرأ الوصف بتاعها ^_^
هتلاقى الأمور وضحت جدا بالنسبة ليك

أشهر التوزيعات بالنسبة للمستخدم العادى Normal user
Ubuntu-Fedora-Open SusE
انت هتلاقى التوزيعة نازلة ببرامج جميلة معاها تقريبا مش محتاج تظبط حاجة

بالنسبة للناس اللى عايزة تتخصص فى Administraion
فأشهر توزيعتين عندنا
RedHat & Debian

ايه ده !!
يعنى انا مينفعش أشتغل على ريدهات كمستخدم عادى ؟!
لا ينفع بس هتحتاج تظبط حاجة حاجتين بإيدك هتلاقى توزيعة زى فيدورا مظبطها أوتوماتيك
طب وديبيان ؟
نفس الكلام ممكن تظبط بإيدك برضه او انك تشتغل على أوبنتو على طول

طب توزيعات Normal User “على حسب التقسيمة” مينفعش أشتغل بيها فى مجال Adminsitration ؟
ينفع بس هتحتاج تشيل كام حاجة حاجتين بإيدك، انت كأدمن مالهمش لازمة معاك

مثال ظريف
انت فى ويندوز 8 عندك Start Menu الجديدة العجيبة دى
انت كمستخدم عادى هى بتسهل ليك الشغل و بتريحك بس بتستهلك من راماتك مثلا
طب لو انت أدمن على سيرفر كبير مثلا، هل هتحتاج حاجة زى دى مثلا ؟!
أكيد لا
وهنقول ليه برضه بس قدام

توزيعات المستخدم العادى بتلاقيها نازلة بحاجات زى دى فى الأول
أنما توزيعات الأدمنز بتلاقيها نازلة كده تقريبا من غير أى حاجة لازم تسطب كل حاجة بنفسك
يهمنى النهاردة الناس تكون فهمت يعنى ايه توزيعات و ايه الفرق بينهم و ده صورة لأشهر توزيعات اللينكس بصفة عامة

linux-distributions

شغلنا ان شاء الله هيكون زى ما ظاهر فى العنوان على توزيعة ريدهات

انتظرونا في الدرس القادم الأسبوع القادم إن شاء الله
دمتم فى أمان الله و السلام عليكم و رحمة الله و بركاته ^_^