/What's Data Base ?

What's Data Base ?


قواعد البيانات : مجموعة بيانات مرتبطه ببعض بتتخزن بطريقه بنشيل فيها كل التكرارات عشان نحصل على أحسن كفاءه فى تخزين وعرض وتعديل البيانات وأقل مساحه تخزينيه .

ضرورى جداً وأنا بشتغل فى أى داتا بيز أحافظ على شوية أساسيات مهمة زى :

  إضافة وحذف وتعديل البيانات  :  مثلاَ لو بشتغل على جدول لبيانات الطلاب , ماينفعش طالب واحد يبقى ليه إسمين أو 2 ID  دا فى الإضافه أو التعديل , مثلاً فى الحذف : ماينفعش أحذف بيانات أساسيه زى الإسم أو التقدير أو الID  وهكذا ,,

  التحكم فى البيانات : أكيد فى شروط  بتتحط على البيانات للحفاظ عليها وعلى ال Security  , بس الشروط دى لحدود بحيث إنه  يُتاح للمستخدم  إنه يسترجع البيانات  ويعدل فيها ,,

  التواصل مع الداتا بيز : أى داتا بيز ممكن يتعامل معاها أكتر من نظام و أكتر من برنامج و أكتر من مستخدم ولازم تناسب كل البيئات اللى هتتعامل معاها , وتناسب التعديل فيها ولكن فى الوقت الواحد بيحصل تعديل واحد بس فى الداتا بيز ,,

 مشاركة البيانات مع الأخرين : من خلال التقارير أو رسائل البريد الإلكتروني أو إنترنت.

يعنى إيه نظام إدارة قواعد البيانات DBMS ؟

DBMS هو إختصار لكلمة ( DataBade Management System )

عبارة عن نظام لتخزين و استعادة و إدارة البيانات .

DBMS :عبارة عن البرنامج اللى بيستخدم نظام لتخزين وإستعادة البيانات مثل :

 Access ، Informix ، Oracle , ..

بتتكون قاعدة البيانات Database من :

1- الجداول Tables : مخزن البيانات الأساسى فى قواعد البيانات .

2- الاستعلامات Queries :  لاسترجاع بيانات تم إدخالها مُسبقاً بصورة معينة من قاعدة البيانات .

3- النماذج Forms : إسترجاع وتعديل البيانات من خلال واجهات جذابة.

4- التقارير Report : الحصول على معلومات عن طريق الطباعه على تقارير مطبوعة .

إيه هيا أنواع الداتا بيز ؟!

1- قواعد البيانات اليدوية: Manual Data Base

ملفات عن المنتجات مخزنة فى أرفف أو أدراج , فواتير مبيعات فى جداول إلكتونية ( Excel ، Quattro ، pro ، ….)

عناوين أشخاص فى ملف و ثائق .

ورغم الترابط دا إلا أنها قابلة فى أى وقت إلى الضياع , عشان كدا فكرنا فى شكل محسن من ترابط البيانات بشكل آمن أكتر.

2– قاعدة بيانات غير مترابطة : None Relational DB Computer System

فى النظام دا بيعمل جدول كبير ( Flat Data Base ) فيه كل البيانات وممكن تكون مكرره , يعنى ممكن تلاقى إسم عميل بتفاصيله مكرره 10 مرات والعنوان والإيميل ورقم التليفون , وفى حالة التعديل بيتعدل 10 مرات. “طبعاً دا نظام غير كٌفء”

3- قاعدة بيانات مترابطة : ROBMS

بيتم تخزين البيانات هنا فى جداول مترابطة , البيانات بتدخل مرة واحدة , إمكانية إنشاء الجداول وتعديلها بسهولة جداً, إمكانية الإضافة والحذف والتعديل فى أى وقت , عدم وجدود أى تكرارات .

إيه  العمليات الأساسية اللى ممكن أعملها على أى على قواعد البيانات ؟

1- إنشاء و تعديل بناء قاعدة البيانات Create Database :

مثال : (أضيف جدول – أحذف جدول – أعدًل جدول ) .

2- تعديل و تحديث البيانات فى قاعدة البيانات Update Database :

– أضيف سجل جديد ( إضافة موظف)

– أعدًل سجل ( تغيير عنوان موظف )

– أحذف سجل ( حذف موظف )

3- عرض محتويات قاعدة البيانات View Database :

عرض محتويات و معلومات جدول مثلاً :

– أبحث عن موظف برقمه

– أحسب إجمالى عدد عمال المصنع.

وممكن أطبع التقارير دى عن طريق الريبورت.

SQL :

 Structural Query Language

 

تمام كدا إحنا عرفنا يعنى إيه داتا بيز يعنى شوية بيانات مرتبطين ببعض , طيب هتعامل مع البيانات دى إزاى ؟
ال SQL هيا لغة التعامل مع البيانات دى و أقصد التعامل مع البيانات يعنى الإضافه , الحذف , التعديل , أعمل جدول أحط فيه و أشيل منه  و أختار وهكذا ,,

السكول متقسمة لعبارات زى :

1. DML “ Data manipulation Language

تعديل البيانات زى :

Select :

أختار صف أو عمود من جدول من الداتا بيز.

Insert :

أضيف صف جديد فى جدول فى الداتا بيز .

Update :

أعدل فى صف أو عمود فى الداتا بيز.

Delete :

أحذف صف من جدول من الداتا بيز.

Merge :

أدمج جدوبين مع بعض.

2. DDL ” Data definition language”

أغيّر فى تعريفات البيانات زى :

Create :

أنشئ جدول أو صف أو عمود فى الجدول.

Alter :

التعديل بوجه عام فى الجدول من حيث إضافه , حذف , تعديل وتغيير الإسم.

Drop :

أحذف جدول من الداتا بيز.

Rename :

أعدل أسماء الجداول وأسماء محتواها.

Truncate :

تمسح كل الصفوف اللى فى الجدول”ودا فرقها عن ال Delete”

3. DCL ” Data control language”

أدى صلاحيات و أحذف صلاحيات زى :

Grant :

أمنح صلاحيات.

Revoke :

أشيل صلاحيات.

من أشهر و أحسن و أعظم قواعد البيانات هى ORACLE

 

      يعنى إيه أوراكل ؟!

اوراكل عبارة عن قاعدة بيانات ونظام لإدراة قواعد البيانات وإدراة المعلومات Relational Data Base ..

من خلال إنه بيحولها إلى قاعدة بيانات يعنى داتا بشكل مُظم ومُرتب ومُمنهج , بيسهل إتخاذ القرار وأخذ القرار الصح وبسرعه.

أوراكل بتعتمد فى البرمجه على لغة ال SQL – Structured Query Language وبتدعمها لغة ال C و VB و. Java

– وبكدا تقدر توصل للبيانات وتتعامل معاها { تعدل – تضيف – تحذف} .

– ممكن أستدعى  Procedures بلغات تانية زى السى أو الجافا.

 

طيب إيه هى أهم أدوات Oracle Developer  ??

 . لإنشاء النماذج : Forms 

 . لإنشاء التقارير : Reports 

. لإنشاء الرسومات البيانية : Graphics

. للبحث فى قواعد البيانات : Query 

. أداة لعمل البرمجيات :Procedure and function 

 

 ليه أوراكل !؟؟

  1.السيكيورتيى عالى جداً فى قواعد بيانات أوراكل بحيث يضمنلك سرية وحماية للمعلومات المُخزنة

2. بتتعامل مع حجم كبير أوى من البيانات ممكن يوصل ل 2 مليون ميجا بايت بحيث بيقويك جداً كديفيلوبر.

3. دعم أوراكل الهائل للمستخدمين عبر النت والسهوله.

4. طبعاً أوراكل أقوى داتا بيز فى مجال البيزنس والتجارة وتكاملها مع جافا من أهم وأكبر المميزات.

إذن .. أنا مطلوب منى أعمل إيه عشان أتعلم أوراكل !؟

 

1. إتعلم لغة SQL

2. إتعلم لغة PL SQL

3.إتعلم إزاى تستخدم أدوات أوراكل فى التطبيقات والتقراير والرسومات البيانية

4.لازم تمرن نفسك وتشتغل بإيدك وعادى توقع فى أخطاء والأخطاء دى اللى بتعلم جداَ

5. تابع النت دايماً فى إصدرات أوراكل وكل التقنيات الجديدة , تابع مشاكل مستخدمين الأوراكل وإتعلم منهم .

فى إنتظار ردودكم وأسئلتكم ..

و شــــــــكراً

إلى اللــــقاء على خير  ,,  إن شــــاء الله  🙂

TAGS: