/تجربتى فى الانتقال من العالم المغلق الي العالم المفتوح – الجزء الأول

تجربتى فى الانتقال من العالم المغلق الي العالم المفتوح – الجزء الأول

لما اتولدت 😀

ياااااااااه انت هتحكي من زمان كده اقفل يا عم الموضوع ده

لا لا خلاص ندخل ف الموضوع

بعد ما كبرت شوية بدأ باباك ومامتك يعلموك ازاي تصلي
وعرفوك ان فيه حاجة اسمها ديانه ، وكان الطبيعي انك تسمع الكلام ويتزرع جواك ان فيه حاجة اسمها ديانه وسلمت بالموضوع جواك
وبدات تقتنع ان تمسكك بدينك والحفاظ علي مبادئه هوا مفتاحك للجنه

وف نفس الوقت بدات تدخل مدرسة وتاخد حصص كمبيوتر (مش اوي يعني)
والاستاذ يفتح الاجهزة قدامكم
ويقولكوا الي قدامكم ده اسمه الويندوز وان ده الحاجة السحرية الي بتعمل كل حاجة ف الدنيا
وبرده ف نفس الوقت بدات تقتنع ان الويندوز ده هوا المفتاح السحري للعالم الاخر ( عالم التكنولوجيا )

وزي ما انت اقتنعت بكلام اهلك عن دينك
برده اقتنعك بكلام استاذ الكمبيوتر عن الويندوز
(هوا اينعم نظرية غلط انك تقتنع بكلام الغير من غير ما تفكر فيه) بس وانت ف السن ده كنت بتستمد كل تفكيرك يا من البيت يا من الاساتذه بتوعك وده كان غصب عنك مش بمزاجك

فضلت عايش مع عمنا الويندوز لحد ما دخلت اعدادي ومن بعدها ثانوي
ومازال هوا المفتاح السحري الي بيخليك تعمل كل حاجة وبيخليك تتفاعل مع العالم الاخر بكل سهولة وبساطة ويسري

كبرت وبدات تتعمق ف التكنولوجيا اكتر واكتر
هنا بقي نقف وقفة

انت عاوز ايه من التكنولوجيا دي ؟
هل عاوزها كشغل ووظيفة وعاوز تبقي انسان تقليدي وخلاص ومش فارق معاك انك تبدع او تعمل حاجة جديدة ف مجالك ؟؟؟ ( مش لازم تكمل الموضوع معلش صدعتلك دماغك )
ولا عاوز تبقي راجل معدي وفاهم انت بتعمل ايه كويس ونفسك تعمل شئ جديد ؟؟؟ ( معلش خليك معانا شوية وليك هدية حباية للصداع لو كملت الموضوع للاخر )
ولا مش فارقة معاك ؟؟؟ ( زيك زي اخوك اول واحد )

مادام كملت
يبقي انت تاني واحد
راجل نفسك تتعمق ف الكمبيوتر وتبقي معدي وفاهم الدنيا ماشية ازاي ف ساعتها هتبدا تفكر
هل الطريق الي انا فيه ده الصحيح ولا ممكن الاقي طريق تاني افضل ؟؟؟

زيها زي بالظبط الي بدأ مثلا وهوا صغير علي الديانه الي اهله كانوا عليها بس كان حد متدين وحابب يتعمق ف الدين
ف مسلمش وقال هيا الديانة دي الصحيحة ، لا بدا يفكر هل الديانه بتاعت اهله دي هيا الصحيحة ولا فيه حاجة تانية غيرها ؟؟

بس فيه فرق بين مثال الديانات ومثال الكمبيوتر
انت بتاع الكمبيوتر مش عارف الا حاجة واحده بس وهيا الويندوز ولذلك تفكيرك كله محصور في المنطقة دي وبس لانك متعرفش ان فيه بدايل
انما بتاع الديانات عارف انه فيه ديانات تانية غير ديانته بس ميعرفش عنها حاجة لسه فممكن يحاول يعرف عن التانيين طالما هوا علي علم بوجودهم

كفاية كلام عن الديانات بقي عشان منعكش ف الكلام ده ويبقي حرام علينا
المهم التشبيه كان لمجرد التوضيح بس ان دي كانت حاجة اتزرعت جواك وانت صغير واتربيت وكبرت وهيا معاك وانت مقتنع ان مفيش حل تاني غيرها

دلوقتي انت كحد نفسه يبقي جامد ومعدي
فضلت شغال علي عمو الويندوز بقالك اقل ما فيها تلت سنين ولا حاجة (شغال بجد مش شغال بلاي ستيشن)
مفيش حته فيه مدخلتش فيها وملعبتش فيها
لدرجة انك ممكن تكون وصلت لمرحلة انك بقيت فاهم الويندوز احسن من الي عملوه وبدات تفكر تعمل دكتوراه فى قايمة ستارت

وبعدين لما زهقت من عمك الويندوز وحسيت انك مش بتعمل حاجة جديدة
بدات تسمع ان فيه حاجة اسمها برمجة

بدات تسال حد كبير وقديم ف المجال
C وبعديها تخش علي ال C++يقولك بص يا سيدي انت تتعلم

وانت طبعا ولا فاهم يعني ايه سي ولا دي ولا اف حتي

ف المهم سالت الي ادلك ده طب ما تجيبلي كتاب اقرا فيه
قام جابلك كتيب حلو كده الفين صفحة ولا حاجة
فتحته قرات اول شوية وبعدين بدات تحس ان ودنك بتطول وشكلها بيتغير
وبعدها قولت ايه مستحيل يكون ده كلام ناس عاقلين خليني ف الويندوز بتاعي الي عمره ما طول ودني ابداً

بعدها بشوية دخلت الكلية بقي وبدات تحتك (جاية م الاحتكاك مش عكس فوقك) بدكاترة ومعيدين وناس من وجهة نظرك للوهلة الاولي انها ناس تقيلة (بعد ما بتعرفهم كويس بتعرف ان وجهة نظرك كانت محتاجة نضارة)
وبدات تسال قول مثلا دكتور عندك او معيد
فقولتله والله يا دكتور انا سالت ف موضوع البرمجة دي قبل كده وقالولي اتعلم سي او سي بلس بلس ف انت ايه رايك
فقالك لا لا سيبك م الكلام ده الدنيا دلوقتي بتتغير والحاجات دي بقت قديمة اوي
طبعاً معظم دكاترتنا متربي من زماااااااااان علي ثقافة الويندوز
ف متزعلش انه هيقولك الكلام الي جاي ده
بص يا سيدي انت عندك دلوقتي لغات جديدة زي  ( الفيجوال بيسك دوت نت والسي شارب ) وانصحك تقرا مثلا ف التانية
وجابلك كتاب
بدات تقرا صفحة واتنين وتلاته وودنك مبتطولش ولا حاجة
الدنيا حلوة وزي الفل
قرات ، طبقت ، بقيت فاهم كل حاجة ف اللغة دي ، بدات تحس انك معدي ، مفيش حاجة معمولة انا مش فاهمها او انا مبعرفش اعملها
خلاص انا كده زي الفل ، انا معدي ، انا جدع

بعدها بفترة لما بدات تحتك بالناس الي شغالة ف المجال
وتعرف ناس من طبقات مختلفة وثقافات مختلفة
ترمي ودنك كده علي اتنين بيتكلموا
تلاقي واحد بيقول للتاني ايه :  “نزلت التوزيعه الجديدة بتاعت لينكس”

تدعك عنيك كويس وبعدين تخبط علي ودانك وتبصيلهم تاني وترمي ودنك تاني بس بزاوية مختلفة
تلاقي التاني بيقوله اه يا عم دا جامده وحتي لسه عامل برنامج امبارح بالبايثون ومشغله عليها وكان سريع اوي عليها

تحس ان الدنيا بدات تغيم اكتر
وتقعد تقول من جواك
توزيعه ، لينكس ، بايثون
مين الناس دي!!!!!!!

وبعدين تحاول مع الوقت تسال الناس وتفهم ايه الكلام الغريب ده

تبدا تعرف ان فيه حاجة اسمها Linux وان الحاجة دي عبارة عن Operating System زيها زي ال Windows
وتفضل لفترة من الزمن معتقد ان ده الفرجن الجديد من الويندوز
وبعدين تحاول تدور علي اي اسطوانة ليه عشان تجرب النسخة الجديدة بقي ما هوا انت معدي مينفعش تنزل حاجة جديدة ومتجربهاش

وتاخد الاسطوانة وتيجي تسطب تلاقي الدنيا شكلها مختلف خالص وانت مش فاهم حاجة
المهم تحاول تعمل اي حاجة ف اي حاجة
ف اول مرة الهارد اتفرمت
رحت رامي الاسطوانة وقولت والله ما انا منزلها ولا مجربها ايه البتاع الي بيفرمت الهارد ده بناقص ماله الويندوز يعني ما هوا حلو اهه وعمره ما فرمتلي الهارد

وبعدها بفترة جيت تبص علي اللاب بتاع واحد صاحبك لقيت حاجة شكلها حلو كده ومش شبه الويندوز مختلفة
فسالته هوا ايه ده يا سيد
وحينها يرد سيد ويقول : هو اانت مجربتهاش دي التوزيعه الجديدة من اللينكس
توزيعه ولينكس تاني مش دي الي بتفرمت الهارد ابعدها بعيد عني يا عم بلاش قرف

وبعدها ترجع تقوله ايه طب ما تجيب الاسطوانة كده وتيجي تسطبهالي
ويجي عمنا سيد ويسطب ويزبط ويسيببلك الجهاز صحراء قاحلة ويسيبك ويمشي وانت تايه ف وسط جهازك
تيجي انت تشغل اغنية يقولك الامتداد غير مدعوم مفيش برنامج يشغلها
تقول اه اكيد لازم انزل ال Winamp وتقوم داخل ف فولدر البرامج الجميل وتيجي تسطب
يطلعلك العلامة الحمرا ف وشك بشتيمه علي طول (انت بتعمل ايه يا متخلف انت مش عارف ان ده ملف EXE العب بعيد اجري)

الا هوا البتاع ده بيعمل كدا ليه معايا (دا انا معدي يا ناس ، دنا كنت خاربها ف الويندوز)
وتقعد تضغط عليها مرتين تلاته كمان احسن تكون ضغطت غلط ولا حاجة او يكون الماوس معلق
وبرده مفيش فايدة

تقول طب سيبك م ال Winamp دلوقتي
وتفتكر انك كنت عامل برنامج بالسي شارب بيشغل الاغاني ومقاطع الصوت
فتيجي تفتحه
اله دا هوا كمان بيطلع رسالة حمرا
وبعدين تقول من جواك ( “الويندوز” ده اكيد ضارب ) انا هنزل النسخة القديمة وخلاص بلاش وجع  دماغ

وفعلا تمسح كل حاجة وترجع للعالم القديم بتاعك تاني حيث يوجد Winamp واغاني والحياة حلوة بالاضافة لاحساسك فيه انك جدع
بس ف نفس الوقت تفتح النت وتبدا تبحث يعني ايه Linux والكلام ده
وتلاقي كلام بيقولك ان ده نظام تشغيل مفتوح المصدر وكلام كتيير كده ….. وانت مش فاهم حاجة
مفتوح ايه ومصدر ايه
مين الناس دي !!!!

وبعدين تقعد تعمل علامات استفهام كتيير ف دماغك ؟ ؟؟   ؟؟؟
نظام تشغيل ؟
لينكس ؟
توزيعه ؟
مفتوحة المصدر ؟
يعني ايه اصلا ؟
معني كده ان فيه حاجة تانية مقفولة ؟
طب هوا ايه الفرق اصلا ؟
يعني اللينكس دي مش فرجن جديد من الويندوز ؟
اله ؟
انا مين ؟

و استنونا العدد الجاى