/تجربتى فى الانتقال من العالم المغلق الي العالم المفتوح – الجزء الثاني

تجربتى فى الانتقال من العالم المغلق الي العالم المفتوح – الجزء الثاني

تكملة تجربتى مع المصدر المفتوح .. اقرأ الجزء الاول ..

المهم فضلت علامات الاستفهام دي جوا دماغك لحد ما حسيت بتوهان ودخلت ف حالة رفض للموضوع ده لانك حاسس بحاجة مش طبيعية

اكيد لازم تحس كده لان كل الي كنت عارفة من قبل كده وبنيت عليه تفكيرك وحياتك حاسس انه مرة واحده كله غلط او فيه حاجة مش مظبوطة او انك اصلا طلعت مش عارف حاجة رغم احساسك قبل كده انك حد معدي وجامد

ف انت عشان تريح دماغك وترجع لحالتك الطبيعية رجعت تاني لويندوزك واغانيك ودنيتك وقولت انا كده تمام انا كده مش وحش بس جواك حاجة بتقولك ان فيه ناس احسن منك وتعرف اكتر منك وانك مش معدي ولا جامد ولا حاجة

ويفضل الاحساس ده جواك لفترة كبيرة وانت مش قادر تسيب حبيبك من ايام الطفولة وهوا الويندوز وتنقل علي حاجة تانية

بس شوية بشوية بتلاقي نفسك من غير ما انت حاسس بدات تحتك بمجتمع مهتم بالمصادر المفتوحة وبيشجعها

وساعتها بيكون جواك احساسين

احساس انك نفسك تبقي زي العالم دي وتعرف الي هما عارفينه وتكمل طريقك وترجع تاني احساسك بانك حد جامد ومعدي

والاحساس التاني بيقولك ما انت مكانش فيه حد زيك علي الويندوز وكنت مقطع الدنيا عليه ليه تشوف بديل مادام هوا متاح قدامك ومفيهوش مشاكل

وتبدا الحيرة تشتغل وتبدا تدخل ف صراعات مع نفسك وعقلك

بس من وجهة نظري

اقطع علي نفسك الصراعات دي وريح دماغك م التفكير ، و جربالدنيا مش هتقف لو جربت يعني

اعتبر نفسك بتجرب تكنولوجيا جديدة بدون ما تبص لموضوع مفتوح ومغلق دلوقتي وخلي القديمة زي ما هيا مترميهاش يعني خلي الويندوز موجود برده بجانب التاني

مش الفكرة انك تسيب الويندوز

الفكرة انك تحاول تجرب حاجة بديلة وتحاول تقارن ده بده وتشوف ايه المميزات هنا وهنا وايه العيوب هنا وهنا وانا اقدر اعمل ايه ف ده ومقدرش ف التاني والعكس

طب تمام انا هحاول اجرب واقارن واشوف

بس ياريت تستني قبل ما تجرب

قبل ما تجرب اي حاجة جديدة لازم تعمل الي بيسموه انك تفكر برا الصندوقيعني اخرج من صندوق الويندوز خالص وابدء عيش كانك اول مرة تقعد علي كمبيوتر

او بمعني تاني بيقولوا افرغ فنجانكيعني كل الي انت فضلت تحطه ف الفنجان من معرفة وخبرة ف الويندوز حاول تبدء تركنه شوية وانت بتتعامل مع الجديد

كل ده بغرض انك وانت بتتعامل مع الحاجة الجديدة ميبقاش عندك اي تحيز لاي حاجة من الاتنين وتبقي محايد ف مقارنتك واختيارك

انا متاكد مليون ف المية انك بعد ما تعمل كده وتفضي كل الي جواك هتفضل برده كفة الويندوز لحد دلوقتي هيا الي راجحة

طب ليه ؟ اشمعني ؟

دا اكيد لانك عندك خبرة ف التعامل مع الويندوز ومعندكش ربعها ف التعامل مع اللينكس

ابسط حاجة انت مش عارف لما هتنزله هتنزل البرنامج الي بيشغلك الاغاني ازاي

طب ازاي هبقي محايد ازاي هقدر اتعامل بنسبه 50 ل 50 ؟؟

هقولك ابدء اعمل نفس الي عملته مع الويندوز

نزل عمنا اللينكس اختارلك اي توزيعه من التوزيعات بتاعته بعد ما تسال حد خبرة وتخليه يختارلك واحده هوا حاسس انك ممكن تتكيف معاها بسرعه

وبعدين نزلها وبعدين اقعد خربط فيها زي ما كنت بتعمل اول ما استخدمت ويندوز وبعدين حاول تتعلم الاساسيات بتاعت نظام التشغيل ده ازاي انزل برامج ازاي ازاي ازي لحد ما تحس ان الاساسيات بتاعتك بقت تمام

دلوقتي انت نوعا ما تقدر تقارن والمقارنة الي حد ما تكون محايدة

تمام

هتبدا تقارن

طبعا انا مش هقول نتايج مقارنة انا هسيبلك المقارنة مفتوحة وانت قارن انت وشوف

قارن من حيث السرعه ، الاداء ، الواجهة ، الامان والحماية ، الالعاب ، كل حاجة تخص ال مستخدم العادي

بعد ما تقارن بين الحاجات الي تخص اليوزر العادي

ابدا قارن بين الحاجات الي تخصك كمطور Developer وكواحد عاوز يعمل حاجة جامده ونفسه يبقي معدي وايه الي انت محتاجه من نظام التشغيل عشان يساعدك علي تحقيق هدفك

اول واهم نقطة ويمكن مش هتكلم ف غيرها

هل انا اقدر اغير ف النظام ده واخليه يشتغل علي مزاجي واطوعه زي ما انا عاوز ؟

دلوقتي انا راجل مبرمج ؟ هل ينفع ابرمج نظام التشغيل ده من جديد او اعدل فيه واخليه حاجة خاصة بيا علي مزاجي ؟

هتيجي علي الويندوز

ما قبل ويندوز 7 كان ممنوع واي طريقة كانت طريقة غير شرعية ( حاول تقرا عن الهندسة العكسية )

ف ويندوز 7 بدات ميكروسوفت تحس بالخطر واتاحت انك ت Develop in windows 7

طب اللينكس

اللينكس من اول ما طلع اصلا لو بتقرا عن تاريخة

طلع عشان هدف واحد بس

انه يكون مجاني ومفتوح المصدر ( حاجة مش ملك حد اي حد يقدر يستخدمها ويعدل فيها )

وهنا جه الوقت الي تعرف فيه يعني ايه مفتوح ويعني ايه مغلق

مفتوح المصدر بالانجليزي Open Source بمعني ان ال Source Code بتاع الحاجة دي متاح ليك وتقدر تستخدمه وتاخد منه وتعدل فيه وتعيش براحتك بس بشرط انك متضيعش تعب غيرك يعني سيب حقوقهم الفكرية زي ما هيا وضيف عليها حقوقك انت كمان

يعني ايه الكلام ده

يعني واحد صاحبك بيالف شعر كويس الف قصيدة جديدة وبعدين جابهالك وقالك اقرئها كده وشوف يمكن محتاجة تعديل

ف انت قراتها ولقيت فيه حاجات ممكن تتعدل وتبقي احسن

ساعتها متقولش علي نفسك انك صاحب القصيدة ، انت كده وحش انت كده اناني ، المفروض تقول تاليف كلا من كذا وكذا ساعتها انت بينت انك شاركت وف نفس الوقت حفظت حق صاحبك اللى مألف النسخة الاصلية

طب مقفول المصدر او مغلق Closed Source بمعني ان ال Source Code غير متاح ليك

انت واخد حاجة كده بيقولك من هنا تقدر تشغل البرنامج ، طب لو انا كمبرمج حابب اعدل ف ميزة من مميزاته بايدي

لا ممنوع يا كابتن مش من حقك انا مغلق وانت ملكش الحق ف كده

زي بالظبط صاحبك كتب قصيدة وبدل ما يقولك خدها شوف محتاجة حاجة لا دا طبع منها نسخ باسمه وادالك نسخة مطبوعه عشان تقراها

ف انت لو حسيت ان فيها حاجة وحشة وحبيت تعدل فيها هتقعد بقي تعدل بس بطرق مش مشروعه لانها دلوقتي مش ملكك اصلا فمش من حقك انك تعدل فيها انت اخرك تقراها وبس ، الي عاوز يعرف ايه هيا الطرق الغير مشروعه انا قولت ملحوظة فوق ( حاول تقرا عن الهندسة العكسية )

طب مش انت بتقول ان ف ويندوز 7 بدات ميكروسوفت تحس بالخطر واتاحت انك ت Develop in windows 7

ايوه بس مش معني كده ان ويندوز سفن بقي مفتوح المصدر

لانه مدالكش كل حاجة وقالك اعمل الي انت عاوزه لا هوا ادالك شوية ادوات وقالك دول هيخلوك تقدر تعدل ف الويندوز بس برده مدالكش الاصل بتاع الويندوز بالاضافة لان الويندوز بفلوس وغالي كمان واحنا طبعا مش بنحس بالنقطة دي لان ماشاء اللي علينا ف ضرب السيريالات والكراكات زي الفل

طب مين الي بيديك كل حاجة وبيخليك تعدل ف كل حاجة ؟ مين الي بيديك كل حاجة ويقولك اعمل الي انت عاوزه وعيش زي ما انت عاوز ؟ وكمان بيقولك انا مجاني ومش هخليك لا تضرب سيريالات ولا كراكات

الي بيعمل كل ده هوا عالم المصادر المفتوحة باكلمه

ازاي الكلام ده

بيديك نظام التشغيل اولا مجاني

ثانيا لو حبيت تطور فيه بيتيحلك تحمل الكود الي هوا معمول بيه من عالنت وتعدل فيه علي حسب متطلباتك

ثالثا بالنسبه لبرامجك مش هتتضطر برده تعمل زي الويندوز وتجيب برامج بفلوس وتضربلها سيريالات وكراكات عشان تشتغل تمام

لا دا كل برنامج ف الويندوز بفلوس ليه بديل ف اللينكس مش بس كده لا ده مجاني وكمان مفتوح المصدر يعني تقدر تعدل فيه كمان

طب ما فيه برامج مجانية علي الويندوز ايه الجديد يعني ؟

لا لا متخلطش الامور ببعضها

انا مقولتش مجانية بس انا قولت مجانية و مفتوحة المصدر

انت هتلخبطني ليه وايه الفرق اصلا ؟

الفرق كبير جداً

معني ان البرنامج مجاني اني اديتلك نسخة منه من غير فلوس وانت بتستخدمها عادي ومفيش عندك مشكلة

لكن معني انه مفتوح المصدر اني اديتلك المصدر الي اتعمل منه البرنامج يعني مثلا اديتك الكود الي انا كتبته وعملت منه البرنامج

يعني اديتلك الاصل ، وقولتلك عدل فيه براحتك وطلع برنامج علي مزاجك

يبقي هنا يبان الفرق بين Open Source And Free Sofware

بس استني عندك ؟

لما هوا حلو كده ليه الشركات الكبيرة الي بتصنع البرامج والتكنولوجيا والالعاب مش بتدعمه

ببساطة لان الشركات الكبيرة بتمشي مع دماغ المستخدم لانه ف النهاية هوا الي بيكسبه فلوس وهوا الي بياكله عيش

ف اذا كان معظم المستخدمين اصلا متربيين علي الثقافة القديمة وهيا ثقافة الويندوز ، اكيد الشركات وغصب عنها مش بمزاجها لازم تحترم الي المستخدم متربي عليه وتعمل كل حاجة عشانه لان لو محققتش رضا المستخدم يبقي كده بتحقق فشلها

كمان الشركات الكبيرة بتاعت بزنس وفلوس لما هتلاقي حاجة مجانا او مش بتهتم بجانب الفلوس اوي اكيد عمرها ما هتشجعها لان لو شجعتها دا معناه انها بتشجع خسارتها

طب ما هوا عندهم حق برده لما كل حاجة مجانا كده هما هيكسبوا منين ؟؟؟

صراحة دي نقطة بتلخبط فيها بس هيا مهمة جداً ف ممكن تسال فيها حد قديم ف الاوبن سورس وهوا يجاوبك

طب هوا انا عشان اعدل ف السورس كود بتاع النسخة ده هستخدم لغة برمجة ايه سي شارب مثلا !!!

اكيد طبعاً لا

امال هستخدم ايه ما انا معرفش الا هيا

يبقي دورلك علي لغة برمجة بتشجع فكر ال Open Source وما اكثرهم وبعدين ابدء اتعلمها وبعدين ابدء اعمل بيها تطبيقات بسيطة وبعدها كبيرة وبعدين ابدأ يا سيدي طور ف النسخة بتاعتك وشوف ساعتها هتحس بايه وانت حاسس انك مالك العالم كله بين ايديك وانك تقدر تعمل اي حاجة ف الدنيا وان مفيش عليك اي قيود

حتي انت عشان تستخدم السي شارب كنت بتنزل ال Visual Studio الي هوا اصلا بفلوس وانت كنت بتضربه برده

يعني حتي عشان تاخد ابسط حقوقك ف الدنيا وهيا انك تبرمج كانوا بيدفعوك عليها فلوس بس طبعا انت مش حاسس بالكلام ده اوي (ربنا يخليلنا السيريالات المضروبة)

طب وانا ليه ادخل ف المتاهات دي كلها ما انا اخليني ف عالم الويندوز بتاعي وانا كنت تمام فيه ؟؟؟

بعد كل ده عاوز ترجع تاني ( انت غاوي سرقة ولا ايه )

انا مش بقولك سيب كل حاجة وتفرغ لعالم الاوبن سورس وسيب الويندوز وسيب كل حاجة كنت تعرفها

بس بقولك ادي لنفسك فرصة تجرب بدايل تانية ومتقفلش الدايرة علي نفسك ما يمكن لما تجرب تحس ان العالم التاني ده افضل من الي انت كنت فيه ويمكن لا بس المهم جرب

طب ليه ما انا وانا قافلها كنت كويس ؟

ياراجل حرام عليك رغم كل الي اتقال ده وكنت كويس

يعني انت كنت كويس وانت حاسس ان حتي ابسط حاجة بتعملها وهيا انك تبرمج بيخلوك تدفع فلوس عشانها

يعني انت كنت كويس لما احتكيت بالناس الي ف عالم الاوبن سورس وحسيت بجهلك الشديد وانك لا معدي ولا حاجة وان كل الي عرفته عن الكمبيوتر قبل كده كانت مجرد معلومات بسيطة رغم انك كنت مبرمج وبتعرف تعمل كل حاجة ف العالم بتاعك وحاسس ان مفيش زيك

انت دلوقتي اصطدمت بالعالم الاخر

ومادام اصطدمت بيه يبقي المفروض تحاول تتعايش معاه وتجرب حياته وتشوفها عاملة ازاي

لكن لو لجأت للحل التاني علي اعتباره الاسهل

ف انت كده بتهرب هروب مؤقت لانك بلا شك هتحتك بالعالم ده تاني وتالت وعاشر والاحساس الي جوك عمره ما هيتغير الا اما انت نفسك تتغير وتغير فكرك وتقتنع بانك لازم تكون مطلع علي كل حاجة وتقارن بين كل حاجة وتحدد مين افضل بالنسبه ليك مش عشان حاجة عرفتها قبل التانية واخدت وقتها ف حياتك وحياة المجتمع يبقي هيا افضل اكيد ده تفكير غلط مليون ف المية

يعني باختصار شديد خلاصة الموضوع اني عاوز اقول شوية جمل ضرورية لاي حد ف مجالنا

افتح عقلك دايما متكونش قافل دايرة تفكيرك علي شوية حاجات ف دماغك وخلاص ومش عاطي لنفسك اي فرصة لتغيير افكارك

اسمع لغيرك حتي لو مش مقتنع بكلامه مش لازم نقتنع بوجهات نظر بعض عادي يعني انت بتتكلم وانا بتكلم ويا تقنعني يا اقنعك يا يفضل كل واحد علي رايه الدنيا متهدتش يعني

عود نفسك انك تكون قابل للتغييير لان مجالنا كل يوم بيتغير وانت لو فضلت حاصر نفسك ف حته واحده بس هتيجي بعد فترة تلاقيك مش عارف تتعايش مع العالم ده لان الدنيا مبتستناش حد

اغسل يديك جيداً قبل الاكل وبعده

كلمة اخيرة ف النهاية ( كلمة كبيرة شوية )

متنتقدش ثقافة ميكروسوفت ولا تنتقد الاوبن سورس

كل واحد مؤمن بحاجة وبيعملها

مفيش حاجة اسمها دا كذا متخلفين او او او

بالعكس لولا الصراع الي بيحصل بين العالمين عمرنا ما كنا هنشوف التطور السريع ده

في اي حاجة لازم تلاقي صراعات

بس مش معني الصراع عدم احترام الغير

احترم تفكير غيرك ومتفرضش رايك عليه

قول رايك وسيبه يقول رايه ويا يقتنع يا ميقتنعش هوا ليه عقل يقدر يفكر بيه ويشوف ايه انسب حاجة ليه وايه الافضل ليه

ممكن انا شايف ان العالم ده مناسب

غيري شايف ان العالم التاني مناسب اكتر

كل واحد بينام علي الجمب الي يريحه زي ما بيقولوا

مادام هوا مريحه خلاص يبقي نسيبه نايم عليه

وانا اسف جداً علي موضوع التعبير الطويل ده

ويارب مكونش صدعتكم 🙂