دلوقتي كام واحد اخد كورس جافا , بايثون , سي بلس بلس , اي كورس عموما ؟
طبعا كل واحد هيقول انا اخدت و اخدت و اخدت
طيب عملت بيهم ايه ؟
ناس هتقوللي لا انا لسه مخلص و ناس هتقوللي لا انا عملت بيها كام مشروع و عملت كذا و كذا و كذا
طيب … احب اقوللك انك مقصر … تخيل
لانك كده اقتصرت علمك عليك بس … مفكرتش انك تنقله لناس بعدك و ده مش كويس
تخيل لو كنت كاتب مقالة او مراجعة او ملاحظة عل موضوع تقني و فجأة اكتشفت ان في حد استخدمها و حل بيها مشكلة ليه … احساسك هيكون ايه ؟
طب ثوابك هيكون عند ربنا قد ايه ؟
انا مش عاوز اقول ده واجب عليك لكن بجد انت لازم تحس انك مسئول عن اللي تحتك … صدقني ممكن تكون شايف الموضوع ضغير لكن عند ناس تانية كبير جدا جدا جدا
حاول تنشر علمك عن طريق مقالة , فيديو عملته , ندوة تلقيها …
و ده علشان العجلة تمشي … اقنعني انك مشوفتش ندوة على الانترنت او حضرت واحدة قريبة منك او بعيدة و سافرتلها … مفكرتش الناس دي عاملاها ليه ؟
اتمنى من الناس اللي قرات المقالة دي انها تعيد التفكير في الموضوع ده و انها تكتب و اشوف مقالات ليها مكتوبة
و في النهاية … خيركم من تعلم العلم و علمه 🙂