/!ماتيجي نكتب؟

!ماتيجي نكتب؟

أنا إبراهيم عبد الفتاح, واحد من الناس اللي ورا الصرح العملاق اللي انت بتقرا فيه المقال ده دلوقتي, و دي حاجة غريبة أصلاً انك تلاقي ليا مقال بالشكل ده هنا, ﻷن أنا من الناس اللي شغالين في إزاي نقدر نطور الموقع على شان تبقى مرتاح و أنت بتتصفحه. عايز اقولوكو إني بعاني دلوقتي وأنا بكتب ﻷني مش متعود أكتب عربي على الكمبيوتر بس بحاول على شان خاطركوا والله. المهم, على شان الموقع ده يعيش و يؤدي الدور اللي معمول على شانه أنا فكرت في ان احنا نعمل دعوة لكل الناس اللي حابة تكتب عندنا هنا بس بشكل تاني غير الشكل اللي احنا قولنا عليه قبل كده.

من ضمن أنواع المواضيع اللي مش محتاجة انك تحضرلها و في نفس الوقت بتكون مفيدة, عي المواضيع اللي من غير عنوان; بمعنى تخيل لو انك عارف حركة معينة في برنامج أو حتى في لوحة المفاتيح ممكن تسهل على الناس شغلهم و مش كلهم عارفينها و أنت مش في دماغك انك تقعد تحضر موضوع طويل عريض على شان تشرحها بس ممكن في جملة صغيرة تقولها, ابعت قولنا عليها واحنا هننشرها باسمك و هتكون مفيدة وكمان مش محتاجة مجهود. و أكيد كلنا عندنا أفكار من دي, و أحسن عدد معين من اﻷفكار, هيتجمع و يبقى في النسخة المطبوعة من الكاتازين سواء كان في جزء مخصص ليه أو كنقط تحت المواضيع المطبوعة.

الموضوع سهل, و هيوفر عليكوا تعب التفكير في مواضيع كبيرة ﻷ و العكس كمان ده ممكن الفكرة الصغيرة دي تشجعك أكتر انك تكتب موضوع كامل 🙂

إيه رأيكوا يا شباب, هتفضلوا قاعدين تتفرجوا ولا هتيجوا نكتب؟ 🙂

 

TAGS: